අද ගමන වෙනස් - කි. මී. 13ක් කරන්න තිබුන එකේ 21ක් කරා. උනේ මෙහෙමයි. උදේ කියු වලින් පිටත්වුනේ 9.30ට. ඊලඟ නවතින තැන, පට්නි, එනකොට දොලහ වෙලත් නෑ. ඉතින් අපි හිතුවා තව ටිකක් ගියොත් ඊලඟ දවස් ලේසිවෙයි කියලා. අන්තිමට වොක්සෝල් පාලම ලඟටම ගියා - එතනින් කෝච්චියේ ආපහු පට්නි ආවා.
මේ අපි කියු හිටපු තැන.
පාරෙයි ගඟෙයි වෙනස්කම් ගොඩයි. මේ හරියේ ගඟේ උතුරෙත් (වම් ඉවුරේ) දකුනෙත් (දකුනු ඉවුරේ) තෙම්ස් පාර තියෙනවා. අපි ආවේ දකුනු ඉවුරේ. ඒකේ නියමෙට ගස් එහෙම හැදිලා තියෙනවා - ලොකු නගරයක් ලඟ කියලා හිතන්නත් බැරි තරමට. අනික් ඉවුරේ දිගටම ගොඩනැගිලි. හොඳ වෙලාවට අපි දකුනු ඉවුරේ ආවේ.
දිගටම වගේ බෝට්ටු පදින අය ඉන්නවා. නමුත් වතුර අඩුයි බාදිය වෙලාව නිසා. මඩ ඉවුරු දිගටම පෙනෙනවා - නියමෙට ගස් එහෙම හදලා තියෙනවා මේ ඉවුරේ. වතුර අඩුතැනක් දැක්කා යාන්තම් වේලුන ගහක් එක්ක; ගඟයි ගහයි දෙකම අහේනියෙන් පෙලෙනවා වගේ! වතුර කොච්චර අඩුද කියලා ජැටියේ බෑවුමෙන් කියන්න පුළුවන්.
ඉස්සර දවස්වල වගේ නෙවෙයි උස, තට්ටු ගානක ගොඩනැගිලිත් දැන් දිගටම තියෙනවා. London Eye කියන ප්‍රසිද්ද කතුරු ඔන්චිල්ලාවත් ඈත පෙනෙනවා (මේක තියෙන්නේ නගරේ මැද - පාර්ලිමේන්තුවට එහා ගඟේ අනික් පැත්තේ). ඒ කියන්නේ අපි ගමනේ අවසානෙට කිට්ටුයි වගේ!
බෞද්ධ පැගොඩාවක් තියෙනවා ගඟ අයිනෙම.
ඒකටවත් වැඳලා බලන්න ඕනෑ ගමන කෙලවර කරගන්නෙ පුළුවන්ද කියලා!
අපි හිතාගෙන ඉන්නේ වැඩේ හෙටින් ඉවරකරන්න - ආයෙ කි. මී. 22ක් විතරයි.
ජයවේවා!
No comments:
Post a Comment